لبست العمة ... قصدى التاج

السلام عليكم ورحمه الله وبركاته

كنت بقالى كام يوم كده مدخلتش على المدونه فدخلت عند دكتورة نهى فى مدونتها المتميزه تأثير الفراشة ولقيتها بعتالى التاج ده

طبعا انا بشكر دكتورة نهى انها افتكرت مدونتى المتواضعه وبحيها على اجابتها الرائعه على اسئله التاج

وربنا بستر علينا بأه هههههههه اصل الواحد ساب نظام الاسئله والامتحانات دى من كام سنه وربنا يستر على التنسيق السنه دى

نيجى بأه لاسئله التاج

س/اسمك؟

روح طفلة

س/المشهورة به وسط أصحابك؟

ممممم هيا كل واحدة تقريبا بتنادينى باسم خاص بيها هيا غير الكل بس علشان الفضايح خلينا نقول دعاء

س/سنك؟

بقالى كتير يعنى عايشه فى الدنيا بس لسه عايشه فى معظم الاوقات بروح الطفولة

س/اسم مدونتك؟

مدونة دائرة الرحلة

س/مجال دراستك؟

العلوم

س/الصورة الرمزية لمدونتك بتعبر عن إيه؟

هيا صوره عاديه مش ذات فكر فلسفى ولا حاجه

بس بحس انها بتعكس الى حد ما جزء من شخصيتى وفيها كم من التناقضات ...ساعات بحس انا طفله بريئه وساعات بحس انها شابه الدنيا تعبتها , ساعات بحس انها بتفكر تفكير عميق وساعات بحس انها سرحانه فى لا شئ وساعات بشوف عنيها حزن وساعات بشوف بريق أمل

س/هل فكرت فى إغلاق مدونتك؟لماذا؟

مممممممممم والله يعنى انا فكرت فعلا فى انى اقفلها اول مافتحتها وده يرجع لان ماليش خبره كافيه فى التدوين وعالم المدونات وغير برضوا انى مش من النوع الى بيقدريتكلم ببراعه على المواقف الى حصلته ويشرك فيها الناس وده السواد الاعظم من المدونين يعنى

بس لاقيت برضوا نماذج محترمه جدا مش لازم انها بتتكلم عن نفسها او المحيطين لكن بتعرض مواضيع وافكار جديره بالاحترام والمناقشة

س/إيه رد فعلك لو حد قل أدبه عليك؟

والله لو كان قل أدبه من باب قلة الادب ليس اكثر ففى الغالب هاسكت وهاشكره يعنى ان ربنا بعتهولى علشان أخد منه حسنات وهاحذف التعليق طبعا مش لموقف شخصى لكن احتراما للناس الى بتدخل المدونة

وسكوتى مش ضعف ولكن زى ما قال الامام الشافعى رحمه الله

قالوا سكت وقد خوصمت قلت لهم ** إن الجواب لباب الشر مفــتاح
والصمت عن جاهل أو أحمق شرفا ** وفيه أيضا لصون العرض إصلاح
أما ترى الأسد تخشى وهي صامتة ** والكلب يخسى لعمري وهـو نباح

س/أسوأ مدونة

ماينفعش طبعا الواحد يقول أسماء بس انا لا انكر ان فيه مدونات دخلتها صدمتنى من ناحيه الالفاظ الى بتتقال فى المدونه وجراءه المواضيع المطروحه ربنا يعافينا ويهديهم يارب

س/هيحصل إيه للإيميل لما تموت؟

هيبأه فى طى النسيان هو وصاحبته

س/إديت الباسوورد بتاعتك لحد؟

لا خالص

س/السفر بالنسبة لك؟

متعه لا تقاوم أنا بحب السفر جدا جدا ويمكن احسن حاجه فيه بالنسبالى ان الواحد فى السفر بيعيد اكتشاف نفسه نتيجه ان الواحد بيتعرض لحاجات كان صعب انه يتعرض ليها غير من خلال تجربه السفر

ومع حبى الشديد للسفر والترحال الا ان احب ان يكون بيتى الاساسى هنا فى بلدى

س/المود بتاعك؟

والله نقدر نقول حبه فوق وحبه تحت بس بحاول على قد ما اقدر مابقاش تحت فتره كبيره علشان انا أول وأخر واحده خسرانه لو فضلت تحت مده كبيرة

س/ بتعمل إيه فى وقت فراغك؟

القراءة ( خصوصا مارواء الطبيعة) تصفح النت وبعض المنتديات الى متبعاها وقراءه الايميلات , برامج معينه فى التلفزيون

س/الأكلة المفضلة لك؟

هو اى حاجه غير الطبيخ وياريت لو مكرونه بالبشاميل او فراخ بانية

س/الصفات اللى ورثتها عن والدك؟

ده سؤال كبير اوى بس ممكن اقول حب السفر وانى اعبر عن رأى بوضوح بس ماقلهوش فى اى وقت لازم اختار الوقت المناسب علشان يكون لرآى تاثير

س/الصفات التى ورثتها عن والدتك؟

العطاء وحب الخير للناس حتى الى ممكن يكونى أذونى وانى ماشلش من حد

س/أكتر ست حاجات بتكرهها؟

1-الكذب بكل اشكاله بما يحتوى من خيانه وخداع

2-الظلم

3-الاستغلال

4-الانانية

5-حب الظهور باى طريقه وان كانت مخالفه للدين والاعراف والعادات

6- القسوة فى التعامل

س/أكتر ست حاجات بتحبهم؟

1- الله سبحانه وتعالى

2-الرسول عليه الصلاة والسلام والصحابه رضوان الله عليهم

3- أهلى وأصدقائى والتجمعات الحلوة الى بتدى للحياه طعم ولون

4-الضحكه الحلوه على وش الاطفال الصغيرين

5-النجاح

6-المشى والتأمل فى ملكوت الله

س/ شخصيتك نوعها إيه؟

أحترت فيها بصراحه بس على حسب المود بتاعى بس حد من بتوع التنميه البشريه كان وصفها بالدرجه الاولى انى من النوع معبر ودود( هما الى قالوا مش انا بررررررررررريء)

بس انا برضوا بحب التفكير العقلانى المنطقى المتسلسل معرفش باه الخلطه ده تتسمى ايه بصراحه

س/لماذا دخلت عالم التدوين؟

النت عامه والتدوين بصفه خاصه مابيعتمدش زى وسائل الاعلام التانيه الى بيكون فيها المشاهد مستقبل بس ومابيقدرش على التفاعل والتجاوب بشكل كبير ( ممكن نستثنى من ده برامج التوك شو ولو ان برضوا نسبه التفاعل فيها وانك تقدر تعبر عن رايك الشخصى فيها محدودة يعنى لو فتحوا مجال للاتصال بيكون المشاركات محدودة)

لكن النت يقدر يستوعب كل الافكار بحريه وكميه مشاركات عاليه

يعنى لما اطرح راى او فكرتى فى مدونه ويجينى عليها تعليقات هاقدر اقيم الا حد كبير سواء لبفكره المطروحه صح ولا غلط غير لما الواحد يقنع نفسه بفكره ما بينه وبين نفسه او بينه وبين محيطه المحدوده

س/أجمل كلمة قيلت فى مدونتك؟

والله انا لسه جديدة فى الموضوع ودكتورة نهى تقريبا هيا الى بتدخل تعلق عندى ربنا يكرمها ويجازيها خير على رفع روحى المعدنية وبعض اصدقائى خارج عالم التدوين الى بيشجعونى

س/ أهمية التعليق بالنسبة لك؟

معيار مهم لما يتم استخدامه بصوره صحيحة

س/أحسن بوست كتبته؟

لا لسه مكتبتهوش ههههههههه

س/أفضل بوست قرأته و أفضل مدونة؟

والله ماشاء الله فى اقلام متميزة فعلا وكل واحد ليه اسلوبه المميز وبعدين فيه حاجات متميزه على المستوى السياسى وفى حاجات تانيه متميزه على المستوى الادبى والشعر وفى حاجات متميزه على مستوى تناول المواضيع الحياتيه بشكل عام فصعب جدا الواحد يختار من كل دول حاجه واحدة بس

س/الانترنت بالنسبة لك إيه؟

بيتى التانى ومرايا لشخصيتك الواقعية لو انت بتعرف تنتقى من خلاله الكويس وتسيب الوحش هيكون ده سيستم حياتك وأداه فظيعه يامه لكسب الحسنات او لكسب السيئات وانت عليك الاختيار

س/تمرر التاج لمين؟

ممممممممم والله انا حتى الان ماعرفش غير تأثير فراشه وهيا الى مررتهولى فانا بقول الى عايز التاج ياخده يالا أوكازيون انشاله محد حوش

فركشششششششش

أنفلونزا العنف

أستوقتنى كثيرا هذه الايام كم الجرائم البشعه التى ترتكب بداخل مجتمعنا المصرى وقد كنت أحدث نفسى فى البداية الامر وأقول لعلها حوادث فرديه

لكن مصر لسه بخيييييييييير

ويوم ورا يوم الموضوع عمال يزيد ويكبر ومابقاش يوم يعدى غير لما نسمع على الاقل جريمه او اتنين من الجرايم البشعه وكانها انفلونزا ماشية فى البلد يمكن خطرها اكبر من انفلونزا الخنازير الى الناس كلها خايفه منها

وكل يوم بتنشر زى انتشار النار فى الهشيم

هاحكيلكم شويه عن الحاجات الى بتتسمع فى التلفزيون وبنقراها فى الجرايد

المشهد الاول

واحد يشيل مسدس كده عادى ويروح يخبط على بيت طليقته الى خلعته ويروح مموتها وموتها أبوها وامها ويصيب اخوها واختها أنتقاما منها انها خلعته وتزوجت برجل أخر !!!!!

هو عادى كده بقينا فى شيكاغو والناس بقيت عادى بتشيل الفرفر ده كأنه الموبيل بتاعها ولا أيه ؟؟؟

المشهد التانى

خناقه بين اتنين فى احد الشوارع الرئيسه من شوارع القاهرة نتيجه ان واحد ماشى بعربيته فى اتجاه معاكس او كسر عليه حاجه زى كده

يعمل أيه الغلطان بأه يتكسف على دمه ويقوله للتانى انا أسف صح ؟؟؟

لالا مابيحصلش عندنا الكلام ده

راح فاتح شنطه العربيه ومطلعله سيــــــــــف وبيهدده بيه تقولش عنتـــــــر زمانه

أمال الدبابير الى واقفه فى كل حته فى الشوارع دى بتعمل ايه ولا دى تبع مسرحيه لازم يؤدوا ادوارهم فيها كويس وخلاص

المشهد التالت

حدثه اشتهرت من اسبوع كده مقتل الطفلين زياد 11 سنه وشهد خمس سنوات
الطفلين نايمين فى امان الله دخل علهم الجانى و (دبحهم) بكل ماتحمل الكلمه من معنى وبعد ماعمل كده انهال عليهم بطعنات متفرقه فى جسد الطفلين الصغيرن بدون أن يرق ولو للحظه لصغر وقله جسدهم البريئ

ومين الى طلع الجانى ابن عمته ابوهم وكان ساعات بينام فى حضن الولاد دول وبيقولوله يا خالو

طب ايه الى يخلى خالو يعمل كده ياولاد؟؟!!!
علشان هو بيشتغل مع بابا وكان عايز بابا يزود يوميته من 35 الى 45 وبابا مرضيش

طب تعمل فينا كده ليه يا خالو 42 طعنه بحالهم فينا ؟؟!! مش كنت بتاكل معانا وبتنام فى حضننا وبتحكيلنا الحدوته !!!!!!!!!!!!!

المشهد الرابع

مشاجره عاديه بين زوجين عادى يعنى بتحصل فى احسن العائلات

ها عمل فيها أيه ضربها؟؟؟

لا

قالها خدى شنطتك وعلى بيت أهلك ؟؟؟

لا

قالها روحى وانتى طالق؟؟؟

لا برضوا

امال عمل أيه
راح خد بناته الاتنين او بناتها زى ماصورله فكره المريض ساعتها ورماهم فى بير وردم عليهم

هو أحنا رجعنا تانى لزمن وئد البنات ولا أية

حســـــبى الله ونعـــــــم الوكيـــــــــــــل

المشهد الخامس

مهندس كومبيوتر ميسور الحال ولديه زوجه يحبها جدا ورزقه الله بشابين فى مقتبل العمر ولد وفتاه وكل منهما ناجح فى حياته

وكان المهندس داخل فى البورصه وجاءت الزمه الاقتصاديه وهزت اقتصاد العالم وهزت اقتصاد ونفسيه هذا المهندس

وخاف على ولاده وزوجته انهم يعيشوا فى مستوى أقل من الى هما عيشينوا فقرر انه يريحهم بطريقته الخاصه وانه يجعلهم شهداء وللاسف دبح مراته وابنه وبنته

(ومن الحــــــــــــــــــــب ما قتــــــــــــــــــــل)

ده غير بأه الاخبار الخفيفه الى بتتسمع عادى دلوقتى واحد او مجموعه يدخلوا على شقه أو الاغلب فيلا والناس موجوده فيها عادى والانوار منوره ويثبتهم بالسلاح ويسرقها ويطلع

او واحد راكن بعربيته فى حته يطلع عليه واحد لابس شراب ويحط السكينه على رقبته وطلع بأه الى فى جيبك يا حلو

كفايه عليكم الجرعه دى صح

بس مكنش هدفى السرد اكتر مايهمنى التحليل

ليه كل ده ؟؟

وايه الى تغير فينا

وهيا لما الدنيا بتقسى علينا بنقسى اوى كده على بعض !!!!!!!!

لما يكون الاب والام هما مصدر الحنان والامان للانسان وفى لحظه يتحول عامل الامان ده لقاتل فى حاله جنان

وياترى السبب فين بالظبط؟

هل فى قله الوازع الدينى عند الناس للدرجه دى القتل بأه سهل اوى كده ومحدش بأه بيخاف من ربنا وللدرجه دى ممكن الشيطان يتملك من الانسان ويخليه أداه يحركها كما يشاء

ولا السبب فى كميه افلام العنف الى بتتعرض علينا دلوقتى وبقي المجرمين يستوحوا منها أفكار وأصبح عادى جدا منظر الدم والقتل وصوت طلقات النار

ولا السبب فى الفقر الى خلى الناس تقتل بعض علشان 50 جنيه اوأقل

ولا فى عنف السلطات الأمنيه تجاه المواطنين سواء بداخل الاقسام أوفى تعاملهم مع المظاهرات السلميه بطريقه فيها أرهاب فكرى

ليه بأه فيه تفشى للحاله السادية عند معظم المصرين؟؟؟؟؟؟؟؟ طبعا انا مش بحب التعميم وفى نماذج برضوا كويسه بس ماينفعش ننكر الحالات دى والا هانعمل زى النعامه وندفن دماغنا فى الرمل وخلاص

تلاقى صاحب الورشه بيعامل الصبى بتاعه بعنف وبيكون مبسوط كده ومنتشى وبيحب يبهدل فيه ادام الناس

ونطلع على كبير شويه نلاقى الناس نفس اسلوب المعامله فى اقسام الشرطه

والمدير بيعامل موظفينه بساديه يرجع الموظف البيت وعايز يطلع الكبت ده وعايز يمارس سلطته الساديتيه طبعا على ميييين على زوجته

وهيا يعنى هاتسكت هاتمسك العيال تديهم علقه محترمه مش هما ولاده !!!!!

هايطلعلوا الولاد دول يبقوا أيييييييييه ؟

ملايكه بجناحات بيضه ؟؟؟

هايوزعوا حنان كده على الرايح والى جاى ؟؟؟

ولا هايطلعوا النماذج الى شفناها دى

من الاخر أحنا فى الفتره دى بنجنى مازعناه من قهر وقمع وعنف من سنين طويله أوى

والحل الوحيد الى ممكن يتعمل من وجهه نظرى الشخصيه وماننتظرش نتايجه قريب اننا نصلح من نفسنا ومن تعاملاتنا وكل واحد يخلى باله هو بيعامل الناس الى شغاله تحت أيده أزاى

واسمحيلى أقولك يا مصر

يا مصــــــــــر انتى مابقيتش بخيـــــــــــر يا مصـــــــــــــــــــر انتى بقيتى فى خطـــــــــر

أهل الحكمة

يُحكى أن شيخاً كان يعيش فوق تل من التلال ويملك جواداً وحيداً محبباً إليه

ففر جواده وجاء إليه جيرانه يواسونه لهذا الحظ العاثر

فأجابهم بلا حزن وما أدراكم أنه حظٌ عاثر؟

وبعد أيام قليلة عاد إليه الجواد مصطحباً معه عدداً من الخيول البريّة

فجاء إليه جيرانه يهنئونه على هذا الحظ السعيد

فأجابهم بلا تهلل وما أدراكم أنه حظٌ سعيد؟

ولم تمض أيام حتى كان إبنه الشاب يدرب أحد هذه الخيول البرية فسقط من فوقه وكسرت ساقه وجاءوا للشيخ يواسونه في هذا الحظ السيء

فأجابهم بلا هلع وما أدراكم أنه حظ سيء؟

وبعد أسابيع قليلة أعلنت الحرب وجند شباب القرية وأعفت إبن الشيخ من القتال لكسر ساقه فمات في الحرب شبابٌ كثر

وهكذا ظل الحظ العاثر يمهد لحظ سعيد والحظ السعيد يمهد لحظ عاثر الى ما لا نهاية في القصةوليست في القصة فقط بل وفي الحياة لحد بعيد

أهل الحكمة لا يغالون في الحزن على شيء فاتهم لأنهم لا يعرفون على وجهة اليقين إن كان فواته شراً خالص أم خير خفي أراد الله به أن يجنبهم ضرراً أكبر، ولا يغالون أيضاً في الابتهاج لنفس السبب، ويشكرون الله دائماً على كل ما أعطاهم ويفرحون بإعتدال ويحزنون على مافاتهم بصبر وتحمل

فلا يفرح الإنسان لمجرد أن حظه سعيد فقد تكون السعاده طريقًا للشقاء.. والعكس بالعكس

فالسعيد هو الشخص القادر على تطبيق مفهوم الرضى بالقضاء والقدر.. ويتقبل الأقدار بمرونة وإيمان هؤلاء هم السعداء حقاً

مما قرأته واعجبنى

دع الايام تفعل ماتشاء وطب نفسا اذا حكم القضاء ولا تجزع لحادثه الليالى فما لحوادث الدنيا بقاء

بداية

السلام عليكم ورحمة الله وبركاته
كثيرا ما تاخدنا الحياة فى رحلات متعاقبه نكتشف من خلالها انفسنا ونكتشف ايضا من هم حولنا
قد لا تكون هذه الرحلات مكانيه بقدر ماهيا فكريه
فما الحياه إلا رحله نعيشها وننسج تفاصيلها ضمن أطارات دوائرها