Welcome to my blog, hope you enjoy reading
RSS

الثلاثاء، 1 يونيو 2010

بحبك اوى ... سامحنى

السلام عليكم ورحمه الله وبركاته



معلش سمحونى على التأخير الفظيع عارفه انى مانفعش اكون مدونه منتظمه لظروف كتير اوى وبشكر جدا كل الناس الى سألت عنى الفتره الى فاتت سواء هنا على المدونه او على الفيس بوك شكرا جدا لاهتمامكم


انا اسفه انى مش هاسرد عليكم ظروف التاخير لانى لما بكتب بحب اكتب لسبب ما


وانهارده حاسه انى عندى كلام كتييييييييير اوى ليه هو لوحده


زمان كنت بكتبله على الورق بينى وبين نفسى وساعات كتير لم كنت افتح اى كتاب قديم الاقي فيه الورق بس عمرى مجمعته فى حته جايز لانى كنت بحب افاجئ نفسى بيه بعد كام سنه

بس انهارده قررت انى اكتبله فى مكان جديد هنا فى مدونتى جايز الورق ماينفعش يكون معايا لاى ظرف ما

عايزه اقوله عارفه انى ساعات كتير بزعلك وانى انشغلت الفتره الى فاتت بحاجات كتير اوى عنك وجايز تكون دلوقتى زعلان منى بس انا عارفه انك رحيم وودود وكريم وهاتسمحنى وهاتفتحلى بابك تانى


عايزه اقولك انى بحبك اووووووووى يــــــــــــــــــاربى


وانى من غيرك عونك وقوتك وسندك ليا لا اسوى شئ انت حبيبى وخالقى ومولاى


اسفه ياربى انى نسيت مهمتى فى الحياة وهيا طاعتك واسفه انى نسيت ان الدنيا مش مكانى الابدى وابتديت احزن على شئ مصيره الى الزوال ونسيت انى أعمر بيت الخلود


عارف يارب انا بحب اوى اسمك الودود ودايما اقول لنفسى سبحانك ربى الود يكون من الملك للعباد ؟؟!! سبحانك ربى ما اكرمك واعظمك
وبحب اوى الآية دى
إن الذين آمنوا وعملوا الصالحات سيجعل لهم الرحمن ودا "96" (سورة مريم)


صدقك ربى ماهو اكيد الود مش هايجى غير من الرحمن
فارحمنى يا الله رحمه تغننى بها عمن سواك حتى انعم بلذه التودود اليك يا ودود


و سامحنى يا ربى لو كنت قلت فى اى موقف مريت بيه بسؤال "ليه"
وانت عندك كل شئ بقدر معلوم

لو كان فى اى حاجه ياربى مانعها عنى علشان انا مقصره فى حقك فالحمدلله انك بتعاقبنى فى الدنيا قبل الأخره

ولو كان ياربى منعى منها خير ليا فالحمدلله انك وكيلى وبتدبرلى امورى


عايزه اقولك كمان ياربى ان لو فيه اى شئ ضايقنى انت قدرته عليا فانا بحمدك عليه
وبشكر جدا اى حد ضايقنى او جرحنى فى يوم من الايام

ولو كان كل وجودهم فى حياتى كان هدفه انى احس باحتياجى وافتقارى اليك
فانا لو هاشكرهم طول عمرى مش هايكفيهم حقهم

فى حاجتين كمان يارب عايزه اشكرك عليهم ودايما بقول عليهم اعظم نعمتين وساعات كتير بغفل عنهم

الحمدلله انى لسه عايشه بتوب وبستغفر ويارب احسن خاتمتى
والحمدلله يارب على نعمه الاسلام بس ساعدنى انى اقدر اقدم لدينى حاجه

والحمدلله ياربى انك انت ربى الودود ... السميع ... البصير ... الحكيم

12 comments:

غير معرف يقول...

روح طفله
ازيك
حمدا لله على السلامه من التاخير

التدوينه رائعه فعلا
للاسف نحن نتغافل عن مهمتنا العباديه باى اعراض زائله من الدنياونشغل بها انفسنا ولا حول ولا قوة الا بالله
فالدنيا هى مكان تجميع حسنات واعداد لليوم الاخر
ويجب علينا النظر للدنيا على هذا الاساس
ربنا يصلح الاحوال
ربنا يكرمك ويوفقك

روح طفلة يقول...

م/محمود فوزى

الله يسلمك يارب من كل سوء

انا الحمدلله تمام

والدنيا فعلا بتنسى الواحد مهنته وهدفه الاساسى

ربنا يصلح حالك وحالنا

وجزاكم الله خيرا على الدعاء

كتاب قرأته... يقول...

السلام عليكم و رحمة الله و بركاته

أتمنى أن تكون أفكارك هذه قوة لتعميق ايمانك بالله أكثر , و الحمد لله أنه جعل لنا طرقا عديدة لكسب الحسنات : أولها و أبسطها ابتسامة مع انسان , ثم الذكر فالدعاء و طلب العلم الوضعي و الشرعي و الوقوف الى جانب الحق و لو بالنية الصادقة مع النفس تجاه الآخرين... ولن يمكننا احصاء جميع مكامن الحسنات لأن الاسلام دين يسر لا عسر؟ , و أتمنى لكم جميعا راحة البال و الأمن و السلام...

و شكرا

Unknown يقول...

مناجاه لازم كل واحد فينا يعملها , ويكون صادق فيها , كلنا بنغلط و إيماننا بيقل .. بس بنرجع نتوب و يزيد الإيمان جوة قلبنا تانى .. أهم حاجة تفضل صلتنا بربنا قوية وإيماننا بيه كبير


تحياتى

روح طفلة يقول...

كتاب قرأته...
وعليكم السلام ورحمه الله وبركاته

جزاك الله خيرا يا استاذ عبد القادر على التذكره

والحمدلله على نعمه الاسلام الذى جعل أمر المؤمن كله خير

روح طفلة يقول...

М€ŝЋМΣŞĦ

عند حضرتك حق والحمدلله ان ربنا مابيسبش الواحد يبعد كتير وبيرجعه تانى

دى فى حد ذاتها نعمه تستحق الشكر

شكرا على الكومنت

أم عمر يقول...

جميل أوي كلامك والحمد لله إنك ممَن يُحسن الظن بالله سبحانه وتعالى ويتوكل عليه في كل أموره ويعود إلى ربه عندما يرسل له رسائل تجعله يراجع نفسه ويراجع علاقته مع ربه..

ربنا يجعلك دايماً من أهل ذكره وشكره ويصلح لك شأنك كله..

روح طفلة يقول...

اللهم امين يا أم عمر

و جزاكى الله خيرا على التعليق

ذكرى رحيل قلم يقول...

السلام عليكم
ازيك يا جميلة انت وحشتيني جدا والله لسه بعته رسالة لنهي ع الفيس بوك بقولها انك اختفيتي انت وروح الطفلة ساعات بحس انكم واحد عشان بتختفوا مع بعض وبترجعوا مع بعض

ذكرى رحيل قلم يقول...

جميلة بجد منجاتك مع الله
الحمد لله الذي هدانا لهذا وما كنا نهتدي لولا ان هدانا الله
ديما حبيبتي في نعمة الاستغفار والتودد الي الله عز وجل
اللهم اغفر وارحم وانت خير الراحمين
دمتي بحب وود

روح طفلة يقول...

وعليكم السلام ورحمه الله بركاته

ربنا يكرمك ويباركلك يا ذكرى
انا كمان كنت مفتقده جدا بريد الجمعه عندك ومفتقده تعليقاتك المميزه على المدونه عندى
وسبحان الله فعلا انا وتأثير فراشه بنختفى فى نفس التوقيت وكمان بدأنا المدونه بتاعتنا فى نفس الوقت تقريبا
فهيا مشاغل الحياه والحياه
ويارب دكتوره نهى يكون المانع عندها خير وترجع قريب ان شاء الله
شكرا جدا بجد على سؤالك علينا والحمدلله ان الموضوع عجبك
تحياتى لك

علاء المصرى يقول...

دعوة للتواصل

تحياتى

إرسال تعليق