عايــــــــــز حــــــــــــقى

عايــــــــــز حـــــقى

من ساعه ما كأس العالم للشباب ابتدى وانا اخدت عهد على نفسى انى ماتفرجش على اى مباريات علشان بس دور الضغط العصبى الى ماشى فى البلد والواحد مش ناقص يعنى

بس علشان مصر زى خالتى بالظبط ونيلها ابن عمى قلت ابقى اعرف نتيجه مصر فى اخر كل ماتش وخلاص نعمل ايه بأه فى الوطنيه الى مبهدلنا دى !!!

وانا معديه قدرااااااا من قدام التلفزيون شفت كده اعلان غريب جدا قلت يا سيتى مادقيش اوى تلاقيهم مخدوش بالهم واهو اى كلام من بتاع الاعلانات ده والسلام

بعدها بيوم اعلان تانى يشبه اخوه الى فات ده !!!!! دى عالم مستفزه بأه

وبعدين اكتشفت والحمدلله انهم مجموعه اعلانات للتعريف بشباب منتخب مصر وحطوا تحت تعريف دى مليون خط

فكره الاعلانات دى كلها مبنيه على ان الناس ماتعرفش الاشخاص دى فبتعاملهم بمنتهى السفه وقله الذوق وعدم الاحترام

يجى مثلا سواق تاكسى يقول للاعب بطريقه مستفزه جدا معلش انت هاتنزل هنا علشان انا داخل حته تانيه ؟؟؟!!!

واللاعب المغمور حتى الان علشان قليل الحيله يا عينى يبص كده بنظرات كلها اسى وينزل يعينى مغلوب على أمره بأه

واعلان تانى فيه زى ظابط مرور او حاجه زى كده بيقوله هنا ممنوع الوقوف يا حبيبى وبيزعق !!!!!!!

طب انا عايزه حقى بأه كانسانه من غير ما كون نجمه سينمائيه ولا بتاع ايه ماينفعش ؟؟!!

و عايزه افهم بأه

هى احنا لازم علشان نتعامل معامله كويسه وكريمه كريمه لازم نبأه نجوم ؟؟!!

هو انا يعنى معرفش اقول للمقصر حضرتك مقصر ولو سمحت أدى وظيفتك كما ينبغى ( ولا ده تأثير الكوكاكولا على اللاعبين وحطوا فى الكانز حاجه اصفره واحنا مش شيفينها ؟)

هو لازم الناس تزعق وتشخط وتنطر علشان تعمل لنفسها بريستيج

وهو ان شاء الله لو فيه مكان ممنوع فيه الركون بتاع ايه يعنى لو حضرتك تعرف النجم المنتظر ماتخليهوش يلتزم بالقانون هو كان ملكيه حضرتك الخاصه

بجد الاعلانات بتجسد الجانب السئ من شخصيات المجتمع المصرى بشكل مستفففففر

طول عمر الشعب عمال يقنع نفسه انه يعينى مسكين وغلبان وان الحكومه هيا الى ظلماه ومفتريه وفيين حقوق الانسان وحقوق البتنجان

لكن الحقيقه بأه الى احنا مش عارفين نعترف بيهم ان احنا الى مش عارفين نعترف بأدميه بعض

احنا الى مقللين من قيمه بعض وقاسين اوى على بعض

الموضوع كله على بعضه ثقافه مجتمع

ليه يعنى مايبقاش عندنا ضمير وكل واحد يؤدى دوره الى مكلف بيه

ليه يعنى مانقدمش الخدمه واحنا بنبتسم ده الرسول عليه الصلاه والسلام قال (تبسمك فى وجه اخيك صدقة)

ليه الناس بتتعامل بالجمايل المحسوبيه والناس الى بتطلع وتنزل فوق القانون ده ولا كانه السلم الموسيقى ونيجى فى الاخر نقول البلد دى اصلها ماشيه بالكوسه

طب ما الكوسه دى احنا كده الى بدعناها يعنى

ماهى كلها دايرة فى بعض انا لو بعامل الناس بضمير وبما يرضى الله وبطريقه ظريفه اكيد لما اروح اخلص مصلحتى فى حته تانيه هلاقى الناس بتعاملنى كده

محدش حاول يسأل نفسه هو ليه اغلب الناس الى بتسافر بره وتعمل فلوس كويسه مابتجيش هنا علشان تسثمر وتستقر فى بلدها

اغلب الاجابات الى بسمعها من المحيطين ان بره بتحس بقيمتك كانسان وهناك كفائتك هيا الحاجه الى بيتم تقيميك فيها (بغض النظر عن الروتين )

انا بس عايزه اوضحلكوا اننا سبب اساسى ورئيسى من المشكله

يارب كل واحد فى البلد دى يقدر ياخد حقه كانسان ويعامل الناس كبنى أدمين ويراعى ربنا فى كل حركاته وتصرفاته

وللى ماشفوش الاعلانات دول اتنين منهم

على العموم شوفوها وقوليولى رآيكم جايز اكون غلطانه