Welcome to my blog, hope you enjoy reading
RSS

الثلاثاء، 10 نوفمبر 2009

حبوب الشجاعة

حبوب الشجاعة


كنت قد تعودت منذ سنوات فى طريق عودتى من الجامعه الى المنزل على رؤية رجل ذو ملامح مصرية سمراء بسيط فى هيئته يرتدى جلباب فاتح اللون ويعتمر طاقيه داكنة يمسك فى يده اذكار الصباح والمساء او ادعيه ويبيعها لطلاب الجامعة والمارة فى الطريق
وكنت دائما تحدثنى نفسى لماذا لا يجد هذا الرجل عملا اخر اكرم له الا يخشى من نظرات اولاده له ؟ الا يستحى ولديه القدره على الوقف ان يستجدى عطف الناس لكى يكسب قوت يومه ؟
كثيرا من الاسئله كانت تدور بخاطرى عندما اراه ولم اكن ابدى اى تعاطف معه بل كنت فى بعض الاحيان انظر له واقول فى نفسى ( الى اختشوا ماتوا )
وفى احدى الايام وفى طريق العودة مررت بجانبه كالمعتاد وكنت قد ضقت ذرعا بحاله السلبيه الموجوده بالمجتمع وقدرتنا الهائله على الاعتراض فى الخفاء دون مواجهه المعترض عليهم , واستجمعت شجاعتى ورجعت أدراجى اليه لأنقل تساؤلاتى الكثيرة إليه وكنت اقول انه قد يستحى ويجد لنفسه عملا اكثر احتراما .
تظاهرت فى بدايه الامر انى أريد ان اشترى منه بعض هذه الاذكار لافتح معه حوار ورحت اصوب له اسئلتى واحدا تلو الاخر بلا هواده وكانه مدفع مصوب اليه
انا : حضرتك عارف ان بقالى اد ايه بشوفك فى المكان ده ؟!!!
عم فلان : اه انا بشوفك من زمان اوى بتعدى من هنا
انا : اه تقريبا من ساعه ما دخلت الجامعه ودلوقتى انا خلصت وتخرجت من زمان , طب هو ليه ماتشوفلك شغلانه تانيه
عم فلان : اصل هاشتغل ايه دى خلاص حاجه اتعودت عليها
انا : اكيد فى شغلانه اكرم لحضرتك من الوقفه دى
عم فلان : والله ايدى على كتفك
كنت قد بدأت ان احس انه شخصيه انتهازيه ويستجدون قوت يومهم من استدراج عواطف الناس مثل الكثيرين الموجودين بهذا العصر
انا : طب حضرتك مابتخافش اولادك يتكسفوا من وقفتك دى , انت تحب تعرضهم للموقف ده ومايكونوش قادرين يعتزوا بشغله والدهم
عم فلان : ابتسامه خافته ونظره مليئه بالكثير من الاسى
انا : على العموم دور وان شاء الله هتلاقى
كنت قد هممت بالانصراف واكمال طريقى و كنت قد بدات ان احس ببعض الارتياح لتوجيهى هذه الاسئلة حقيقه لم اكن اريد من اسئلتى هذه سوى بيان الاعتراض على هذه الحاله ولم تكن تعنينى اجابات هذ الاسئله لانى أعلم انى لن اجد لها اجابات وفى مخيلتى انى قد وصلت لغاياتى
ولكنه قاطع توارد افكارى وقال لى بلكنته الصعيدية
على فكرة انا مش جاهل انا دارس فقه وسيره وسنه وخريج ازهرى !!!!
ولعلمك انا كنت امام فى الجامع كمان وكنت بدى للناس دروس!!
نزلت هذه الكلمات على كالصاقعه , وسألته لماذا أذن تفعل بنفسك هذا
قال لى بكلمات بطيئه وكانها تتعثر فى طريق خروجها
انا كنت امام فى الجامع ومتعين تبع الازهر وانا من سوهاج وواحد صاحبى كان عايز يعمل سلفه وحد يضمنه فى 2000 جنيه وقصدنى وانا ضمنته وقلت ده واحد حبيبى وعارفه والكلام ده كان اكتر من 10 سنين
وبعد ما ضمنته جاب تلفزيون وعرفت انه باع وسافر قلت هايرجع تلاقيه راح يقضى مصلحه فى بحرى وهايجى تانى ومحطتش فى دماغى
لحد ما فى يوم لاقيت ورقه جيالى على البيت ان عليا حكم سجن تلات سنين وان الحكم طلع غيابى وانا مكنتش اعرف ان فيه محكمه اصلا ومحدش بلغنى بيه
واتحبست التلات سنين فعلا وبعدها عملت جوابات كتير للوزارة علشان ارجع شغلى تانى لانى ماليش ذنب والوزاره وفقت لكن الاداره فى البلد عندنا رفضت رفض تام ومقدرتش ارجع لوظفيتى تانى
وانا كان عندى تلات ولاد وامهم ولازم اصرف عليهم
تركت سوهاج وجيت هنا ادور على شغل وعند نزولى من الميكروباص وقعت وكسرت قدمى من ناحيه الكاحل فلا استطيع ان احمل اوزان ثقيلة
فلم اجد غير هذه المهنه
اما عن اولادى فابنى الكبير معيد فى كليه الشريعه والاخر ذو وظيفه محترمه باحدى المطارات والصغرى فى كليه الاعلام قسم الصحافه وتتخرج كل سنه بامتياز
وقد قلت لهم ان كل من يعمل منكم لا اريد منه قرشا واحد وان بيتى سوف اظل اصررف عليه حتى اخر يوم فى حياتى
وعندما يقرر كل واحد منكم الارتباط لا يقول انى ابيه وسوف اجلس مع المدعويين فقط وساكتفى برؤيتكم سعداء !!!
حقيقه لم اجد الكلمات المناسبه للرد عليه وكان جزء كبير من افكارى تتداخل بداخل بعضها البعض ولكنى احسست بالتعاطف معه ولم اكن قد غيرت قناعتى بانه يجب عليه الاستسلام والرضا بهذ الوضع وعليه السعى لايجاد ماهو افضل
ودعته وانصرفت وقد طلب منى ان أسال عليه من فتره لاخرى وقد وعدته بذلك واكملت طريقى.
لم يمضى سوى خمس دقائق من انصرافى عن هذا الرجل الا وقد وجدتنى امام امرأه فى اوائل العقد الثالث بالموقف وتطلب من رجل يبدو عليه الوقار اجره المواصلات وقد هم الرجل فعلا باخراج المال من محفظظته ولكن حظها العاثر
انى رأيتها تاخد من احد الماره الاخرين اجره المواصلات
لم اشعر بنفسى الا وانا التفت الى هذا الرجل وقلت له بهدوء ان هذه السيده قد اخذت بالفعل اجره المواصلات من احد الماره ولم التفت اليها
ولكنى تركت ورائى سيل من الشتائم والدعاوى المصبوبه عليا صبا
ومن بين هذه الكلمات كانت حرام عليكى احنا بنسترزق ليه كده ؟؟؟
كنت مستاءة جدا جدا من ابتزاز مشاعرى وتحويلها لشكل مادى فى نقود او اجرة المواصلات اللعينه تلك.
ولكن عندما رجعت الى منزلى شعرت بعدم راحه من شجاعتى تلك وواجهت نفسى ببعض الاسئله التى لم تكن تخطر ببالى
باى حق اطلب من هذا الرجل وتلك المرأه ان يجدوا عملا افضل ؟ أمن كثره فرص العمل الموجوده بيبنا؟؟
الا يمكن ان يكون فى انتظار هذه السيده التى فى نظر المجتمع نصابه العديد من الافواه الجائعه المنتظره لعودتها لهم بما يسد رمقهم؟
لماذا الومهم على ما اسميته نصبا؟؟ أألومهم لان نصبهم ظاهرا للعيان , لكنى لا استطيع ان اتبين نصب من هم اكبرا منصبا ويستطيعون النصب بطرق يظهر من خلالها ان كل شئ رسمى وقانونى ؟
لم استطيع ان اجد تفسير يريح عقلى من هذا الصراع الدائر بداخلها
حقيقا لم أعدى ادرى اهم جناة ام مجنى عليهم ؟؟!!

17 comments:

غير معرف يقول...

السلام عليكم
جزاكم الله خيرا على طرح هذا الموضوع الهام والخطير فعلا
انها مسئوليه المجتمع والدوله
هناك مسئوليه على المجتمع من خلال اهل الخير والجمعيات الخيريه
حيث تقوم بالمحاوله بايجاد فرص عمل لامثال هؤلاء او اعطائهم منح شهريه لمن تكون ظروفهم لا تسمح
اعرف ان هذه الجمعيات الخيريه لا تتحرك بسهوله وخصوصا بعد قانون الجمعيات الصادر منذ عده سنوات

ولكن مازال منهم من يتحرك بفضل الله
شجاعتك فاجأتنى بصراحه لانها مخاطره بالنسبه لبنت
بالنسبه لى باحاول فى اوقات كثيره اصلاح بعض السلبيات التى اراها بفضل الله - ولكن اعتقد ان الامر بالنسبه لبنت صعب شويه
ربنا يجازيكي كل خير

فالنصيحه لامثال هؤلاء اعطائهم عناوين لجمعيات خيريه
والله المستعان

بالطبع لا يمكنك الجزم بانهم نصابون ام مظلومون ام متكاسلون
ولكن ربما يكون الوضع افضل عندما يحاولون مع الجمعيات الخيريه واهل الخير مع البحث عن عمل اخر
ربنا يكرمك ويوفقك دايما
واسف للاطاله

د/عرفه يقول...

السلام عليكم

ما شاء دايما المواضيع هنا مميزة

والجميل ان الواحد بيستفيد من مواقف حياته اليومية اللى بتعدى علينا عادى بس بتكون له وجهة نظر مختلفة وده الجميل

المهم
بصراحة انا بحسدك لشاجعتك فعلا لانها مش موجودة فى كتير من الرجالة حتى
وكمان بأيدك فى موقفك لازم الواحد يتحرك بايجابية شوية فى المجتمع المحيط واظن ان كلمتك وتصرفك خصوصا مع الشيخ الازهرى ممكن تغير فيه كتير او على الاقل عملتى اللى عليكى


وجزاكم الله خيرا
ودايما من تميز لتميز

sara يقول...

السلام عليكم و رحمه الله و بركاته
والله انا حقيقي مستغريه علي وضعنا في مصر ناس مظلومه تدخل السجن و مسجلين خظر بيسعوا في الارض فساد لا حول و لا قوه الا بالله اما بالنسبه لشجاعتك فطبعا حاجه جميله ان الانسان يواجه اللي بيحصل امامه فتحيتي ليكي علي شجاعتك و ربنا يهدينا اجمعين و يعز الاسلام و المسلمين

sara يقول...

السلام عليكم و رحمه الله و بركاته
والله انا حقيقي مستغريه علي وضعنا في مصر ناس مظلومه تدخل السجن و مسجلين خظر بيسعوا في الارض فساد لا حول و لا قوه الا بالله اما بالنسبه لشجاعتك فطبعا حاجه جميله ان الانسان يواجه اللي بيحصل امامه فتحيتي ليكي علي شجاعتك و ربنا يهدينا اجمعين و يعز الاسلام و المسلمين

روح طفلة يقول...

م/محمود فوزى
وعليكم السلام ورحمه الله وبركاته

والله للاسف انا عندنا تجارب مريره جدا مع المؤسسات الخيريه دى
لان اغلبها بتكون مجرد اسماء وليس لها هم غير جمع الاموال بدافع تأمين اجره مقر المؤسسه او لم تبرعات لاقامه الحفلات

لكن تغير حقيقى ملموس مشفتش حد كده بصراحه خصوصا انا مش من القاهرة انا من الاسماعيليه
فالمؤسسات محدوده جدا جدا وحاولنا للاسف نكون جمعيع خيريه لكن كثره التعقيدات الروتينيه اوقفتنا

والله انا شايفه الحل الوحيييييييد للموضوع ده ان الناس بتوع التعداد الى بيخنقونا باسالتهم دول يعملوا بيان للحالات فعلا المحتاجه نتيجه الداتا بيز الى عندهم ويتم توزيعها على المحافظات وكل محافظه تقسمهم بمعرفتها على الجمعيات الاهليه المؤهله فعلا لاداء وظيفتها
والله المستعان

روح طفلة يقول...

د/عرفة
وعليكم السلام ورحمه الله وبركاته
ربنا يباركلك يارب
والحمدلله ان موضوعاتى بتعجب حضرتك

اما بالنسبه لشجاعتى الى ظهرت فجأه خلتى مستغربه من نفسى فعلا هى انى حسيت اننا مش هانقدر نوصل للى بيتصرف غلط من وجهه نظرى الى قد اكون مصيبه فيها او مخطئه الا اما اوجهه يعنى لازم اقول واتكلم
هافضل اعترض بينى وبين نفسى كده وخلاص
وبعدين كلامى معاهم بينيلى حاجات كتير كانت غايبه عن بالى ومكنتش حطاها فى حسباتى
بجد نفسى البلد دى حالها يتصلح لاننا نستحق اكتر من كده فى عقول فى البلد دى تستحيق انها تعيش عيشه اكرم من كده والقلوب الطيبه الى هنا تستاهل تعيش فى جو من الارتاح النفسى افضل من كده بكتير
وعلشان ده يبتدى يحصل لازم نتحرك باى حاجه

روح طفلة يقول...

sara
وعليكم السلام ورحمه الله وبركاته

والله عندك حق فعلا حاجه تخوف انك تكونى عايشه وسط مرتشيين وسذج والطيبين المظلومين جوه السجون
بس ان شاء الله فى امل
ان هذه الامه تمرض ولكن لا تموت

غير معرف يقول...

بجد كتبت كمنت اكتر من 5 مرات
بس يللا ولا يهزك المهم البلوج بتاعك حلو اوى يا دوع
انا فى الحكاية دى بعمل بقول الله تعالى "واما السائل فلا تنهر" عشان اريح ضميرى وكل واحد ونيته بقى

بس كده اسمى مش مكتوب ولا حاجة.....زعلان زعلان يا وزة

إيمان يقول...

السلام عليكم جزاكِ الله خيراً على جميع موضوعاتك الرائعه جعلها الله في ميزان حسناتك أخيتي..

أما بالنسبة لهذا الموضوع فأعتقد أن الحيره فيه تتلاشى عند سماع هذا الحديث الصحيح للنبي عليه الصلاة والسلام وفهمه فهماً جيداً..

وهو أنه قال رسول الله صلى الله عليه وسلم: يا قبيصة ! إن المسألة لا تحل إلا لأحد ثلاثة : رجل تحمل حمالة فحلت له المسألة حتى يصيبها ثم يمسك . ورجل أصابته جائحة اجتاحت ماله فحلت له المسألة حتى يصيب قواما من عيش ( أو قال سدادا من عيش ) . ورجل أصابته فاقة حتى يقوم ثلاثة من ذوي الحجا من قومه : لقد أصابت فلانا فاقة . فحلت له المسألة . حتى يصيب قواما من عيش ( أو قال سدادا من عيش ) فما سواهن من المسألة ، ياقبيصة ! سحتا يأكلها صاحبها سحتا
الراوي: قبيصة بن مخارق الهلالي المحدث: مسلم - المصدر: صحيح مسلم - الصفحة أو الرقم: 1044
خلاصة الدرجة: صحيح

ومعنى الحديث: (تَحَمَّلْت حَمَالَة): بِفَتْحِ الْحَاء وَتَخْفِيف الْمِيم مَا يَتَحَمَّلهُ عَنْ غَيْره مِنْ دِيَة أَوْ غَرَامَة لِدَفْعِ وُقُوع حَرْب تَسْفِك الدِّمَاء بَيْن الْفَرِيقَيْنِ . ذَكَرَهُ اِبْن الْمَلِك . قَالَ الطِّيبِيُّ : أَيْ مَا يَتَحَمَّلهُ الْإِنْسَان مِنْ الْمَال أَيْ يَسْتَدِينهُ وَيَدْفَعهُ لِإِصْلَاحِ ذَات الْبَيْن فَتَحِلّ لَهُ الصَّدَقَة إِذَا لَمْ تَكُنْ الْحَمَالَة فِي الْمَعْصِيَة .


(حَتَّى يُصِيبهَا): أَيْ إِلَى أَنْ يَجِد الْحَمَالَة أَوْ يَأْخُذ الصَّدَقَة

(أَصَابَتْهُ جَائِرَة): أَيْ آفَة وَحَادِثَة مُسْتَأْصِلَة مِنْ جَاحَهُ يَجُوحهُ إِذَا اِسْتَأْصَلَهُ وَهُوَ الْآفَة الْمُهْلِكَة لِلثِّمَارِ وَالْأَمْوَال


(حَتَّى يُصِيب قِوَامًا): بِكَسْرِ الْقَاف أَيْ إِلَى أَنْ يُدْرِك مَا تَقُوم بِهِ حَاجَته الضَّرُورِيَّة

(أَصَابَتْهُ فَاقَة): أَيْ حَاجَة شَدِيدَة اُشْتُهِرَ بِهَا بَيْن قَوْمه

(ثَلاثَة مِنْ ذَوِي الْحِجَا): أَيْ الْعَقْل الْكَامِل

(أَصَابَتْ فُلَانًا الْفَاقَة): أَيْ يَقُول ثَلَاثَة مِنْ قَوْمه هَذَا الْقَوْل لِأَنَّهُمْ أَخَبَر بِحَالِهِ وَالْمُرَاد الْمُبَالَغَة فِي ثُبُوت الْفَاقَة

(ومَا سِوَاهُنَّ): أَيْ هَذِهِ الْأَقْسَام الثَّلَاثَة

(سُحْت): بِضَمَّتَيْنِ وَبِسُكُونِ الثَّانِي وَهُوَ الْأَكْثَر هُوَ الْحَرَام لَا يَحِلّ كَسْبه لِأَنَّهُ بِسُحْت الْبَرَكَة أَيْ يُذْهِبهَا


وجزاكِ الله خيرا..

روح طفلة يقول...

غير معرف يقول...

طبعا دى دينونه حبيبتى وصديقة الكفاح والتشرد الاطفالى مش محتاجه طبعا اسمك يبان علشان اعرفك يابنتى الهرم الخامس من اهرامات مصر بما انى انا الرابع يعنى ههههههههههههه

اما بالنسبه للموضوع وانك بتعملى بقول الله تعالى (واما السائل فلا تنهر)
فمش عارفه يا دينا اعتقد اننا مفروض ندقق شويه فحكايه السائل دى لان كل الناس بقيت بتستهل اوى السؤال ومافيش عزه النفس والكرامه الى كانت عند العربى زمان دى
وربنا يتقبل كل اعمالنا ان شاء الله
معلش باه ممشورينك معانا ومخلينك تكتبى الكومنت 5 مرات هيا دى الصداقه الصدوقة

روح طفلة يقول...

إيمان يقول...

ربنا يكرمك ويعزك يارب
حقيقى اول مره اسمع عن الحديث ده واعرفه وكمان انتى وضحتى معناه
فمش عارفه اشكرك ازاى وربنا يجعله فى ميزان حسناتك يارب

تحياتى لك

غير معرف يقول...

معلش فى التاخر الكبير فى الرد
بس انا معاكي فى ان فيه جمعيات كثيره مش جاده
لكن الحمد لله فيه ناس بتشتغل بضمير
برضه فيه مشكله الروتين الممل
ربنا يوفقك ممكن تلاقى فرصه تانيه فى عمل جمعيه خيريه
بس اقتراحك حول بتوع التعداد فده صعب لانهم لو كانوا عايزين يعملوها كانوا عملوها من زمان
او كانوا سهلوا الشغل بتاع الجمعيات الخيريه وانشائها
ربنايصلح الاحوال

غير معرف يقول...

كل سنه وانتى طيبه
ربنا يسعدك ويكرمك ويوفقك للخير دايما

روح طفلة يقول...

م/محمود فوزى

وحضرتك بالف خير وسعاده يارب
ربنا يكرمك ويعزك ويوفقنا واياك الى الخير والى ما يحب ويرضى

mohamed ghalia يقول...

الموضوع فعلا يستاهل الطرح
احيانا بناخد بالمظاهر ومش بنقدر نقدر الى قدمنا كويس
من وجهة نظرى انهم مجنى عليهم

روح طفلة يقول...

mohamed ghalia
فعلا احنا مجتمع بياخد بالمظهر بشكل كبير اوى
شكرا على المرور والتعليق

عبد القادر الجزائر يقول...

حقا موضوع مفيد جدا , حيث أنه للأسف الشديد موجود في مجتمعاتنا ككل...
حيث أشكرك على اهتمامك بذلك الرجل الشريف الذي أتبث للكل أن الرجولة لا تأخد مبدأ المعاملة بالمثل مع شخص كمثل ذلك المحتال , حيث أنه كان قادرا أن يظرب ظربته على أي انسان سواء سرقة بالتهديد أو سرقة بالكذب و التظليل , و ذلك حتى يستعيد ما ضاع منه سابقا بسبب ذلك المحتال الذي احتال علية لأجل 2000 جنيه أولا و ثانيا حتى لا يبقى في الشوارع أمام مرأى نظرات المجتمج , الا أن انسانيته و رجولته لم تسمحا له بفعل ذلك.

و الحقيقة يا أختي , أنه أصبحنا نعيش كمسلمين في مجتمعات اختلط فيها الحابل بالنابل , و الصالح بالطالح , و لو أني أملك نظرية اجتماعية شخصية في هذا الزمن , حيث اكتشفتها من خلال تعاملي مع المجتمع بكل فئاته , فوجدت أنه 70 بالمائة من الناس المهمشين في هذا العصر خاصة الفقراء والبطالين هم أناس طيبون و قانعون و مسالمون , فلم تغريهم الحياة الدنيا يزينتها من أموال و عقارات و شركات...
بل يا أختي و اضافة الى كل ذلك قد تكون السعادة من نصيب ذلك الرجل المسكين المهمش الذي لا ينظر اليه أحد , قد يكون هو الرجل الرقم 1 في السعادة مع زوجته و أولاده و الى غير ذلك, فقديما قالوا أن البيوت السعيدة لا صوت لها...
و هذا لا يعني أن الأغنياء هم أيضا ليسوا شرفاء , و انما كثرة المال و وجود الرافاهية لدى شخص ما , قد تجلب الشكوك , و هذا كما كتبت أنت سابقا على موضوعك
, حيث أنه لا أحد يحاسب من هم في مناصب عليا حيث يحترفون السرقة و الفساد بكل أنواعه الا الله سبحانه , حيث تجد أن أغلب أولائك ليست لهم أسرة متماسكة و لا أولاد شرفاء و لا زوجات صالحات...و ذلك هو جزاء الله سبحانه
نسأل الله أن يزقنا في الدنيا حسنة و في الآخرة حسنة..
و أشكرك على الموضوع الهام و الهام جدا.

إرسال تعليق